Starfsreglur bekkjarfulltrúa

Dæmi frá Háteigsskóla

Starfsreglur fyrir bekkjarfulltrúar foreldra í Háteigsskóla

Í upphafi skólaárs skal kjósa tvo fulltrúa foreldra eða forráðamanna úr hverri bekkjardeild. Hlutverk bekkjarfulltrúa er að efla og styrkja samstarf foreldra og nemenda og leitast við að treysta samband heimilis og skóla innan hverrar bekkjardeildar. Bekkjarfulltrúar mynda fulltrúaráð foreldrafélagsins. Bekkjarfulltrúar hvers árgangs koma sér saman um einn megintengilið árgangsins við stjórn foreldrafélagsins. Bekkjarfulltrúar undirbúa val á eftirmanni sínum og skulu miðla upplýsingum til þeirra um bekkjarstarfið. Bekkjarfulltrúar eru ennfremur tenglar við skólastjóra um almenn innri mál bekkja, taka við athugasemdum frá einstökum foreldrum, safna þeim saman og óska eftir fundi með skólastjóra ef þörf er á.

Stjórn félagsins setur bekkjarfulltrúum starfsreglur.

Starfsreglur

  1. Bekkjarfulltrúar eru tengiliðir foreldra við umsjónarkennara og koma sjónarmiðum foreldra á framfæri þegar þess er þörf. Í samvinnu við kennara skipuleggja þeir í upphafi skólaárs almennan fund með foreldrum þar sem lagðar eru línur fyrir bekkjarstarf vetrarins.
  2. Bekkjarfulltrúar fylgjast með því að foreldrastarfið sem ákveðið er í bekknum sé framkvæmt, t.d. bekkjarkvöld, ferðalög, umræðufundir, heimsóknir og jólaskemmtun. Æskilegt er að skipta foreldrum bekkjarins í litla hópa (4-5 foreldrar) til að skipuleggja einstök verkefni vetrarins.
  3. Bekkjarfulltrúar ræða við umsjónarkennara um skólastarfið og gang mála í bekknum og miðla upplýsingum til annarra foreldra, t.d. á fundum eða með dreifibréfum í samvinnu við kennara.
  4. Bekkjarfulltrúar eru tengiliðir bekkjarins við Foreldrafélag Háteigsskóla og sitja í fulltrúaráði foreldrafélagsins.
  5. Bekkjarfulltrúar safna í bekkjarmöppu gögnum um það sem gert hefur verið í foreldrastarfi í bekknum og ýmsum öðrum gögnum, t.d. frá skólanum, foreldrafélaginu og skólayfirvöldum.
  6. Bekkjarfulltrúar reyna að hlusta eftir sjónarmiðum nemenda varðandi bekkjarstarfið og bekkjarandann og foreldrastarfið í bekknum.
  7. Bekkjarfulltrúar aðstoða kennara við að skipuleggja þátttöku foreldra í skólastarfinu ef um það er að ræða, t.d. í tengslum við vettvangsferðir, starfskynningu og heimsóknir foreldra í bekkinn.
  8. Bekkjarfulltrúar undirbúa val á eftirmönnum sínum og miðla upplýsingum til þeirra og afhenda bekkjarmöppu.