Foreldrarölt

.
.
.
.

Til hvers er foreldrarölt?

Fyrst og fremst vegna þess að okkur er ekki sama. Við viljum varna því að unglingarnir okkar lendi í vanda. Við viljum líka koma í veg fyrir hópamyndanir eftir lögleglan útivistartíma. Nærvera fullorðinna þar sem unglingar hafa safnast saman hefur róandi og fyrirbyggjandi áhrif. Líkur á að unglingarnir lendi í aðstæðum sem ógna þeim eða hræða minnka þegar fullorðnir eru nálægir. Nærvera fullorðinna gefur unglingunum tækifæri til að leita aðstoðar ef á þarf að halda.

Af hverju þú?

Langflestir foreldrar standa vel að sínum unglingum og þeir eru ekki úti eftir að lögbundnum útivistartíma lýkur. Margir spyrja því hvers vegna þeir eigi að fara út af heimilinu frá sínu barni til að passa annarra manna börn? Með því að taka þátt í foreldrarölti höfum við áhrif á hverfisbraginn og það félagslega umhverfi sem við, og börnin okkar, búum við. Því færri sem nota vímuefni, eru lagðir í einelti eða beittir einhvers konar ofbeldi, því betra og öruggara er umhverfi okkar. Við berum öll ábyrgð á okkar nánasta umhverfi og eigum að sýna þeim sem eiga í vanda að okkur er ekki sama. Auk þessa kynnumst við fleiri foreldrum, við höfum gott tækifæri til að ræða sameiginleg áhugamál og, síðast en ekki síst, við eigum saman ánægjulega stund á heilsubótargöngu um hverfið okkar!

Hvernig á að hegða sér á foreldrarölti?

  • Við eigum að sjást. Gott er að vera í endurskinsvestum sem flestir skólar útvega.
  • Við eigum helst ekki að vera færri en fimm saman, en röltum þó einhvern vanti.
  • Við þurfum að vera til taks ef unglingarnir þurfa á okkur að halda.
  • Við þurfum að geta hlustað og leiðbeint án þess að stjórna.
  • Við hringjum á lögreglu ef upp koma árekstrar, ofbeldi, slys, vímuefnaneysla og -sala eða annað sem krefst afskipta. Tökum fram að við séum foreldrar á rölti.
  • Við ræðum ekki málefni einstaklinga sem við mætum á foreldrarölti við óviðkomandi.

Eðlilegt er að sérstakur rölthópur eða röltstjóri í hverjum skóla haldi utan um röltið í heild sinni, skipti röltinu niður á bekki, en ábyrgðinni á þátttöku sé dreift. Eðlilegt er að bekkjarfulltrúar, eða rölthópur í hverjum bekk, skipuleggi þátttöku foreldranna og skipti þeim niður á daga.
Heppilegast er að foreldraröltið hefjist alltaf á sama stað og á sama tíma, t.d. kl. 22:00. Þá eiga þeir, sem ekki eru skráðir á foreldraröltið en vilja gjarnan vera með, auðveldara með að taka þátt.
Gott er að hver hópur skili skýrslu, annað hvort í þar til gerða bók eða á lausum blöðum. Þetta auðveldar þeim sem á eftir koma að átta sig á stöðunni í hverfinu.

Hjá SAMFOK er hægt að fá  upplýsingar og aðstoð við að skipuleggja foreldrarölt.