Fyrir skömmu fagnaði SAMFOK 30 ára afmæli sínu en samtökin voru stofnuð þann 9. apríl árið 1983 af hugsjónafólki úr röðum grunnskólaforeldra. Formönnum foreldrafélaga, fyrrum stjórnarmönnum, skólastjórum, skóla- og frístundaráði Reykjavíkur, samstarfsfólki á skóla- og frístundasviði og öðrum velunnurum SAMFOK var boðið til fagnaðar í Ráðhúsi Reykjavíkur af þessu tilefni.
Margrét Valgerður Helgadóttir formaður SAMFOK og Oddný Sturludóttir formaður skóla- og frístundaráðs fluttu ávörp og sú síðarnefnda lék undir afmælissöngnum.
Ritnefnd afmælisblaðs SAMFOK kynnti blaðið sem gefið var út í tilefni afmælisins en hana skipuðu Bergþóra Valsdóttir, Guðni Olgeirsson og Unnur Halldórsdóttir.
Guðni og Unnur fengu einnig afhent Fjöregg SAMFOK fyrir ómetanlegt framlag og hugsjónastarf í þágu grunnskólanemenda og foreldra þeirra.
Fyrsta stjórn SAMFOK var sérstaklega heiðruð og ungt listafólk flutti söng- og dansatriði auk þess sem flutt voru gamanmál. Guðrún Valdimarsdóttir fyrrum formaður SAMFOK stýrði samkomunni með myndarbrag.
Í haust mun SAMFOK standa fyrir málþingi í tilefni afmælisins og stýrir Hildur Björg Hafstein fyrrum formaður SAMFOK undirbúningsnefnd.
Stjórn og starfsmaður þakka öllum þeim sem hafa lagt hönd á plóginn við að gera afmælisárið eftirminnilegt.
Fleiri myndir frá afmælisveislunni má finna hér: Myndir frá 30 ára afmæli SAMFOK
